សម្តេចតែងមានប្រសាសន៍សូមមន្ត្រីជំនាញត្រួតពិនិត្យឱ្យបានហ្មត់ចត់ចំពោះករណីកន្ទេលធំបន្លំដេកទៅលើបទល្មើសផលអនុផលព្រៃឈើនៅកម្ពុជា
ក្រចេះ៖ កាលពីរសៀលថ្ងៃអាទិត្យ ទី២៣ ខែមីនា ឆ្នាំ២០២៥ នៅភូមិត្រាំដុំ ឃុំវឌ្ឍនៈ ស្រុកសំបូរ ខេត្តក្រចេះ មានការភ្ញាក់ផ្អើលមួយកើតឡើងដោយមានរថយន្តវេអងមួយគ្រឿងបានផ្ងារជើងខ្ជាក់ចេញសុទ្ធតែឈើដុំខ្នាតធំ ដែលគ្របពីលើដោយឈើដើមកាស្យាពីរបីជាន់ពីលើ បើកុំតែក្រឡាប់ផ្ងារជើងនោះទេក៏មិនដឹងថាបានលួចដឹកឈើខ្នាតធំៗដាក់នៅពីក្រោមនោះដែរ។
រថយន្តវេអងមួយគ្រឿងពាក់ស្លាកលេខ ភ្នំពេញ 4A-4063 បានក្រឡាប់ផ្ងារជើងបានបង្កឱ្យមានការភ្ញាក់ផ្អើលទាំងប្រជាពលរដ្ឋ សកម្មជនការពារធនធានធម្មជាតិ និងមន្ត្រីជំនាញជាខ្លាំងដោយរថយន្តវេអងដែលបានផ្ងារជើងនោះបានខ្ជាក់ចេញមកសុទ្ធតែឈើខ្នាតធំៗជាច្រើនហាក់ដូចជាជំនាញក្នុងការដឹកជញ្ជូនបទល្មើសព្រៃឈើទាំងនេះកន្លងមក។
ប្រជាពលរដ្ឋ និងសមត្ថកិច្ចបានដាក់ការសង្ស័យថា ឡាននេះចេញពីក្រុមហ៊ុនស៊ីបាយអូថិច នៅចំណុចភូមិល្មួល ឃុំបឹងចា ស្រុកសំបូរ បានដឹកដើមកាស្យាពីលើ លុះបើកមកដល់ចំណុចផ្លូវកែងជិតវត្តត្រាំដុំ ក៏ក្រឡាប់ផ្ងារក្អួតចេញសុទ្ធតែឈើហ៊ុបនៅខាងក្នុង បានធ្វើឱ្យមហាជនមានការរិះគន់យ៉ាងខ្លាំងចំពោះក្រុមហ៊ុននេះ ដែលកន្លងមកតែងតែដឹកកាស្យាប្រើរូបភាព កាស្យាពីលើឈើពីក្រោមរាប់ឆ្នាំមកហើយពុំមានសមត្ថកិច្ចណាម្នាក់ដឹងពីបញ្ហានេះឡើយ។
អ្នកភូមិក៏បានរិះគន់ចំៗថា ក្រសួងមានសមត្ថកិច្ចម្តេចមិនដឹងតើរឿងនេះ មានការឃុបឃិតគ្នាឬយ៉ាងណា? នៅក្នុងក្រុមហ៊ុនស៊ីបាយអូថិចនេះ គួរតែសមត្ថកិច្ចចុះត្រួតពិនិត្យនិងដាក់ការស៊ើបអង្កេតឱ្យបានស៊ីជម្រៅ ទៅលើក្រុមហ៊ុនណាដែលប្រើរូបភាពបំភាន់ភ្នែករាស្ត្រក៏ដូចជាបំភាន់ភ្នែកសមត្ថកិច្ចនៅតាមដងផ្លូវ។
យោងតាមផេកផ្លូវការរបស់លោក តាន់ គឹមសួ បានបង្ហោះថា «ខ្ញុំសូមផ្ដោតការសង្ស័យទៅលើក្រុមហ៊ុន Think Biotech (Cambodia) Co Ltd ចំពោះករណីកន្ទេលធំបន្លំដេកនេះ។ ខ្ញុំគិតថាប្រសាសន៍របស់ប្រមុខរាជរដ្ឋាភិបាលគឺគ្មានតម្លៃទេចំពោះមន្ត្រីដែលមានសមត្ថកិច្ច ឬក្រុមហ៊ុនទទួលបានសិទ្ធវិនិយោគលើដីសម្បទានសេដ្ឋកិច្ចបានជាហ៊ានបំពានលើគោលការណ៍របស់ក្រសួងដោយប្រើរូបភាពកន្ទេលធំបន្លំដេកបែបនេះ។ សូមគោរពស្នើសុំថ្នាក់ដឹកនាំ និងព្រះរាជអាជ្ញារអមសាលាដំបូងខេត្តក្រចេះនេះតែម្ដងមេត្តាបើកការស៊ើបអង្កេតយ៉ាងយកចិត្តទុកដាក់ និងមានវិធានាការចំពោះក្រុមហ៊ុនដែលបានប្រព្រឹត្តបទល្មើសធនធានធម្មជាតិឲ្យបានតឹងរឹងជាទីបំផុតដើម្បីឆ្លើយតបទៅកាន់ប្រមុខរាជរដ្ឋាភិបាល ជាពិសេសទៅកាន់មហាជនឱ្យបានឃើញថាគណៈបញ្ជាការឯកភាពខេត្តក្រចេះនេះតែងតែបង្ក្រាបនូវបទល្មើសធនធានធម្មជាតិគ្រប់រូបភាពដោយមិនមានការយោគយល់អ្វីបន្តិចទាល់តែសោះ»។
ភ្នាក់ងារអង្គភាពសារព័ត៌មានយើងខ្ញុំមិនអាចសុំការបំភ្លឺពីក្រុមហ៊ុនស៊ីបាយអូថិចបានទេ ព្រោះមិនមានលេខទូរស័ព្ទដើម្បីទំនាក់ទំនង។
អង្គភាពយើងផ្សាយតែរឿងពិតពុំមានចេតនាញុះញង់មួលបង្កាច់ទៅលើស្ថាប័នដែលពាក់ព័ន្ធណាមួយឡើយ ផ្សាយទៅដោយក្រមសីលធម៌ និងវិជ្ជាជីវៈនៃរបបសារព័ត៌មាន ហើយរង់ចាំការបកស្រាយបំភ្លឺបន្ថែមពីគ្រប់ភាគីដែលពាក់ព័ន្ធគ្រប់ពេលនិងម៉ោងធ្វើការ៕ សូមអរគុណ
