លោក លី សាម៉េត ហៅគ្រូមា និងបក្សពួកដែលបានពាក់ព័ន្ធនឹងសំណុំរឿងព្រហ្មទណ្ឌចំនួន៤ករណីនោះត្រូវកាត់ទោសសរុបទាំងអស់ចំនួន៨៨ឆ្នាំ
ភ្នំពេញ ៖ កាលពីថ្ងៃទី២២ ខែតុលា ឆ្នាំ២០២៥កន្លងទៅ ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសក្រុមអតីតឧកញ៉ា លី សាម៉េត ហៅគ្រូមា ចំនួន៤សំណុំរឿង បើទោះបីអ្នកនាំពាក្យសាលាដំបូងរាជធានីភ្នំពេញ មិនទាន់ឬមិនប្រកាសជាផ្លូវការនូវសាលក្រម ដែលបានសម្រេចផ្តន្ទាទោសលើជនជាប់ចោទខាងលើ និងបក្ខពួក៩នាក់ ពាក់ព័ន្ធនឹងសំណុំរឿងព្រហ្មទណ្ឌចំនួន៤ករណីក្តី តែព័ត៌មានដែលទទួលបានបង្ហាញថា ក្រុមនេះមានទោសសរុបទាំងអស់គ្នាចំនួន៨៨ឆ្នាំ។
សំណុំរឿង៤ករណីនោះរួមមាន៖
ទី១- សំណុំរឿងសូកប៉ាន់លុយរាប់សិបម៉ឺនដុល្លារអាមេរិក យកតំណែងជាអភិបាលខេត្តពោធិ៍សាត់សាលក្រមផ្តន្ទាទោសជនជាប់ចោទ ៖
-ឈ្មោះ លី សាម៉េត ហៅគ្រូមា ភេទប្រុស អាយុ៧១ឆ្នាំ ដាក់ពន្ធនាគារកំណត់ ៦ឆ្នាំ។
-ឈ្មោះ ឡាយ វិសិដ្ឋ ភេទប្រុស ដាក់ពន្ធនាគារកំណត់ ៦ឆ្នាំ ។
-ឈ្មោះ ឡាច សំរោង ភេទប្រុស ដាក់ពន្ធនាគារកំណត់ ៧ឆ្នាំ (កំបាំងមុខ) ។
ទី២- សំណុំរឿងឆបោក ទទួលយកប្រាក់រត់ការដើម្បីចូលក្របខណ្ឌមន្ត្រីគយ សាលក្រមផ្តន្ទា
ទោសជនជាប់ចោទ ៖
-ឈ្មោះ លី សាម៉េត ហៅគ្រូមា ភេទប្រុស ដាក់ពន្ធនាគារកំណត់ ៦ឆ្នាំ ។
-ឈ្មោះ មួង ឃីម ភេទប្រុស ដាក់ពន្ធនាគារកំណត់ ៧ឆ្នាំ ។
-ឈ្មោះ ឆាយ សុវណ្ណារី ហៅ ចែមួយ ភេទស្រី ដាក់ពន្ធនាគារកំណត់ ៦ឆ្នាំ ។
-ឈ្មោះ ហើង ទិត្យរាត្រីលក្ខណ៍ ហៅ ស្រីមុំ ភេទស្រី ដាក់ពន្ធនាគារកំណត់ ៥ឆ្នាំ តែទោសនេះតម្រូវឲ្យអនុវត្តក្នុងពន្ធនាគារ ២ឆ្នាំ ទោសនៅសល់ព្យួរ ។
ទី៣- សំណុំរឿងទទួលសំណូករាប់សិបម៉ឺនដុល្លារ ដើម្បីរត់ការយកតំណែងជាអភិបាលក្រុងអរិយក្សត្រ ខេត្តកណ្តាល សាលក្រមផ្តន្ទាទោសជនជាប់ចោទ ៖
-ឈ្មោះ លី សាម៉េត ហៅគ្រូមារ ភេទប្រុស ដាក់ពន្ធនាគារកំណត់ ៦ឆ្នាំ ។
-ឈ្មោះ ដួង តារា ភេទប្រុស ដាក់ពន្ធនាគារកំណត់ ៦ឆ្នាំ ។
-ឈ្មោះ ឡាច សំរោង ភេទប្រុស ដាក់ពន្ធនាគារកំណត់ ៦ឆ្នាំ (កំបាំងមុខ) ។
-ឈ្មោះ កន សុខកាយ ភេទប្រុស ដាក់ពន្ធនាគារកំណត់ ៦ឆ្នាំ ។
ទី៤- សំណុំរឿងពុករលួយឃុបឃិតដោះដូរ
(លក់)ទីតាំងពន្ធនាគារខេត្តកំពង់ឆ្នាំង សាលក្រមផ្តន្ទាទោសជនជាប់ចោទ ៖
-ឈ្មោះ លី សាម៉េត ហៅគ្រូមា ភេទប្រុស ដាក់ពន្ធនាគារកំណត់ ៦ឆ្នាំ ។
-ឈ្មោះ ដួង តារា ភេទប្រុស ដាក់ពន្ធនាគារកំណត់ ៦ឆ្នាំ ។
-ឈ្មោះ មួង ឃីម ភេទប្រុស ដាក់ពន្ធនាគារកំណត់ ៧ឆ្នាំ ។
-ឈ្មោះ អ៊ុត ធី ភេទប្រុស ដាក់ពន្ធនាគារកំណត់ ២ឆ្នាំ ។
ដូច្នោះសរុបទោសទាំងអស់គឺ ៨៨ឆ្នាំ ។
សូមជម្រាបថា សំណុំរឿងគ្រូមា លី សាម៉េត និងបក្ខពួក ត្រូវបានតុលាការលើកយកមកបើកសវនាការសាកសួរដេញដោលរួចរាល់ហើយ កាលពីថ្ងៃទី១៣-១៤ ខែសីហា ឆ្នាំ២០២៥ ដែលមាន៤សំណុំរឿងដូចខាងលើ ៖
១-សូកប៉ាន់រាប់សិបម៉ឺនដុល្លារយកតំណែងជាអភិបាលខេត្តពោធិ៍សាត់ ។
២-ទទួលសំណូករាប់សិបម៉ឺនដុល្លារ ដើម្បីរត់ការយកតំណែងជាអភិបាលក្រុងអរិយក្សត្រ ខេត្តកណ្តាល ។
៣-ឆបោកយកប្រាក់រត់ការចូលមន្ត្រីគយ ។
៤-ពុករលួយឃុបឃិតដោះដូរ(លក់)ទីតាំងពន្ធនាគារខេត្តកំពង់ឆ្នាំង ។
សំណុំរឿងទាំង៤ខាងលើនេះ មានជនត្រូវចោទ៨នាក់កំពុងជាប់ឃុំ និងម្នាក់កំពុងគេចខ្លួន៖
១-អតីតឧកញ៉ា លី សាម៉េត ហៅ គ្រូមា
២-ឈ្មោះ ដួង តារា អតីតរដ្ឋលេខាធិការ
៣-អតីតឧកញ៉ា អ៊ុត ធី ពាណិជ្ជករ
៤-ឈ្មោះ មួង ឃីម អតីតផ្កាយ២ ជាមន្ត្រីជាន់ខ្ពស់នគរបាលជាតិ
៥-ឈ្មោះ ឡាយ វិសិដ្ឋ អតីតអភិបាលរងខេត្តពោធិ៍សាត់
៦-ឈ្មោះ កន សុខកាយ អតីតអភិបាលរងក្រុងអរិយក្សត្រ ខេត្តកណ្តាល
៧-ឈ្មោះ ឆាយ សុវណ្ណារី ហៅ ចែមួយ
៨-ឈ្មោះ ហើង ទិត្យរាត្រីលក្ខណ៍ ហៅ ស្រីមុំ ។
សូមជម្រាបថា សំណុំរឿងឆបោក ផ្តើមចេញពីអំពើពុករលួយដូចសម្លកំពឹសរបស់អតីត
ឧកញ៉ា លី សាម៉េត ហៅគ្រូមា និងបក្ខពួក ត្រូវបានសមត្តកិច្ចបើកការស៊ើបអង្កេតនៅដើម
ខែវិច្ឆិកា ឆ្នាំ២០២៤ ដោយមានការចាប់ខ្លួនជាបន្តបន្ទាប់ ក្នុងនោះមានខ្លះអតីតជាឧកញ៉ា ខ្លះឯកឧត្តម និងខ្លះជាអាជីវកររកស៊ីធម្មតា សរុបជិត១០នាក់ ដាក់ពន្ធនាគារជាបណ្តោះអាសន្ន ។
ទាក់ទិននឹងព័ត៌មានស្តីពីការបង្ក្រាបនិងចាប់ខ្លួនជនសង្ស័យក្រុមអតីតឧកញ៉ា លី សាម៉េត ហៅគ្រូមា កោះសន្តិភាពធ្លាប់បានផ្សព្វ ផ្សាយលម្អិតតាំងពីដំបូងរួចមកហើយ ប៉ុន្តែអ្វីដែលមហាជនទន្ទឹងរង់ចាំមើលនោះ គឺសាលក្រមរបស់សាលាដំបូងរាជធានីភ្នំពេញ។ ជាមួយនេះ ក៏បានតាមដានដែរថា តើឈ្មោះ ឡាច សំរោង គេចខ្លួនដល់ណា ទើបបាត់សូន្យបែបនេះ ?
អង្គភាពយើងខ្ញុំផ្សាយតែរឿងពិតមិនមានចេតនាញ៉ុះញ៉ង់ធ្វើឱ្យប៉ះពាល់ស្ថាប័នណាមួយឡើយផ្សាយទៅដោយក្រមសីលធម៌ និងវិជ្ជាជីវៈ នៃរបបសារព័ត៌មាន អង្គភាពយើងនឹងរង់ចាំការបកស្រាយបំភ្លឺពីគ្រប់ភាគីដែលពាក់ព័ន្ធគ្រប់ពេលនឹងម៉ោងធ្វើការ៕