កំពង់ស្ពឺ៖ រថយន្តម៉ាកហុងដាហ្វីត ពាក់ស្លាកលេខ ខេមរៈភូមិន្ទ01​ 2-5492 បើកវ៉ាជែងរថយន្តមួយផ្សេងទៀតរួចទៅបុកម៉ូតូហុងដាឌ្រីម C120 ពាក់ស្លាកលេខ ប៉ៃលិន 1A-3378 ពេញទំហឹងបណ្ដាលឱ្យបុរសម្នាក់រងរបួសធ្ងន់បាក់ភ្លៅទាំងសង្ខាង ហើយម្ចាស់រថយន្តរត់គេចខ្លួនបាត់ស្រមោល មិនព្រមទទួលខុសត្រូវឡើយ ហេតុការណ៍នេះបានកើតឡើងកាលពីវេលាម៉ោង07:35នាទី យប់ថ្ងៃទី21 ខែតុលា ឆ្នាំ2025 ស្ថិតនៅក្នុងភូមិព្រៃសាលា ឃុំរលាំងគ្រើល ស្រុកសំរោងទង ខេត្តកំពង់ស្ពឺ។

បើយោងតាមប្រភពពីប្រជាពលរដ្ឋរស់នៅក្បែរនោះ ដែលឃើញហេតុការណ៍បានឱ្យដឹងថា កាលពីវេលាម៉ោង07:35នាទី យប់ថ្ងៃទី21 ខែតុលា ឆ្នាំ2025 គេឃើញរថយន្តម៉ាកហុងដាហ្វីតពណ៌ស្លាបកំភេម ពាក់ស្លាកលេខ ខេមរៈភូមិន្ទ01 2-5492 បើកបរបញ្ច្រាសទិសគ្នា ក្នុងល្បឿនលឿន រីឯម៉ូតូបើកបរពីលិចទៅកើត មកដល់ចំណុចកើតហេតុ គេឃើញរថយន្តបង្កបានវ៉ាជែងរថយន្ត មួយគ្រឿងផ្សេងទៀត ចូលទៅផ្លូវម៉ូតូ រួចបុកម៉ូតូយ៉ាងពេញទំហឹងបណ្ដាលឱ្យ​អ្នកបើកបរម៉ូតូរងរបួសធ្ងន់បាក់ភ្លៅទាំងសង្ខាង ហើយបានដឹកបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តកំពង់ស្ពឺបានមួយយប់ទើបពេទ្យបង្អែកខេត្តកំពង់ស្ពឺបានបញ្ជូនមកពេទ្យលោកសង្ឃនៅរាជធានីភ្នំពេញបន្តទៀត។

ប្រភពដដែលបានបន្តទៀតថា ក្រោយពីកើតហេតុគេឃើញមានមនុស្សស្រីពីរនាក់ វ័យ ប្រហែល20ឆ្នាំជាង ចេញពីរថយន្ត អ្នកបើកបររថយន្តបានគេចខ្លួនភ្លាមៗ ហើយម្នាក់ទៀតត្រូវបានប្រជាពលរដ្ឋឃាត់ឱ្យនៅកន្លែងកើតហេតុ ក្រោយមកក៏មានបុរសម្នាក់មកអះអាងដោះស្រាយ និងបានទុកលេខទូរសព្ទឱ្យសមត្ថកិច្ច 070 250 007 ហើយក្រោយមកទៀតសមត្ថកិច្ចក៏បានអូសរថយន្តបង្កខាងលើនោះទៅប៉ុស្តិ៍នគរបាលរដ្ឋបាលរលាំងគ្រើល។

តាមការលើកឡើងពីម្ដាយរបស់ជនរងគ្រោះបានឱ្យដឹងថា គាត់ទើបតែមកពីធ្វើការចំណាកស្រុកពីប្រទេសថៃ ហើយក៏បានមកធ្វើការរោងចក្របានត្រឹមតែ 10ថ្ងៃប៉ុណ្ណោះ នៅភូមិឃុំកើតហេតុខាងលើ កូនប្រុសរបស់គាត់ឈ្មោះ វុធ សាវង់ បានបើកបរម៉ូតូមកយកអ្នកស្រីចេញពីធ្វើការ ទើបបណ្ដាលឱ្យមានគ្រោះថ្នាក់កើតឡើងបែបនេះ។

អ្នកស្រីបានឱ្យដឹងបន្ថែមទៀតថា នៅព្រឹកថ្ងៃទី22 ខែតុលា ឆ្នាំ2025 សមត្ថកិច្ចបានទំនាក់ទំនងហៅអ្នកស្រី និងភាគីម្ខាងតំណាងឱ្យជនបង្កហេតុចូលមកសម្របសម្រួលគ្នា ហើយក្នុងការសម្របសម្រួលនោះ ភាគីតំណាងអ្នកបង្កបានសួរទៅអ្នកស្រីថា តើអ្នកស្រីយកសំណងប៉ុន្មាន? អ្នកស្រីថា សុំឱ្យភាគីបង្កជួយតែថ្លៃព្យាបាលជំងឺចំនួន 7000$ ទៅបានហើយ ព្រោះកូនប្រុសរបស់អ្នកស្រីមានសភាពធ្ងន់ បានបាក់ភ្លៅទាំងសងខាង អាចនឹងពិការអស់មួយជីវិតក៏ថាបាន ហើយចំពោះដំណោះស្រាយសម្របសម្រួលនោះ គឺមិនបានបញ្ចប់នោះទេ រហូតមកដល់បច្ចុប្បន្ននេះ។

លោកវីរៈសេនីយ៍ទោ សៀក វ៉េត ប្រធានការិយាល័យចរាចរណ៍ផ្លូវគោកស្រុកសំរោងទង បានប្រាប់មកអ្នកសារព័ត៌មានយើងកាលពីថ្ងៃទី04 ខែវិច្ឆិកា ឆ្នាំ2025 នេះថា ម្ចាស់លេខទូរសព្ទ 070 250 007 មានឈ្មោះ លូ ចំណែកលេខទូរសព្ទ 015 88 42 43 ជាម្ចាស់ឡានមានឈ្មោះ រី តែលោកមិនដឹងអាស័យដ្ឋាននោះទេ លោកគ្រាន់តែដឹងតាមគេថា ម្ចាស់ឡានគឺនៅផ្លូវ51 ហើយចំពោះនីតិវិធី លោកបានឱ្យម្ដាយជនរងគ្រោះ ដាក់ពាក្យបណ្ដឹងបញ្ជូនទៅតាមនីតិវិធីច្បាប់រួចរាល់ហើយដែរ។

ចំណែកម្ចាស់លេខទូរសព្ទ 070 250 007 មានឈ្មោះ លូ បានធ្វើប្រាប់​មក​អ្នកសារព័ត៌មាន​កាល​ពីថ្ងៃទី06 ខែវិច្ឆិកា ឆ្នាំ2025 ថា លោកគ្រាន់តែជាអ្នកស្គាល់គ្នាជាមួយម្ចាស់ឡាននោះទេ ហើយម្ចាស់ឡានពឹងឱ្យលោកជួយទៅមើលឡានដែលបានបុកគ្នាខាងលើតែប៉ុណ្ណោះ លោកមិនបានពាក់ព័ន្ធនឹងករណីគ្រោះថ្នាក់​ចរាចរនោះទេ។

ចំពោះលេខទូរស័ព្ទ 015 88 42 43 ជាម្ចាស់ឡានមានឈ្មោះ រី នោះ អ្នកសារព័ត៌មានយើងព្យាយាមទំនាក់ទំនង តែមិនអាចទំនាក់ទំនងបានព្រោះខលមិនចូលនោះទេ។

ប្រជាពលរដ្ឋក៏ដូចជាមហាជនជុំវិញស្រុកសំរោងទង បានលើកឡើងតៗគ្នាថា បើសមត្ថកិច្ចចង់ស្រាវជ្រាវវែកមុខជនបង្កនោះមិនពិបាកនោះទេ រថយន្តពាក់ស្លាកលេខ ខ.ម ហើយមានបិទឡូហ្គោក្រុមហ៊ុនដឹកដីឈ្មោះ SSP ដែលមានលេខរៀង NP-026 យ៉ាងច្បាស់ត្រឡែក​បែប​នេះ​ទៅហើយ ហេតុអ្វីបានជាវែកមុខជនបង្កមិនបាន? ឬក៏មានការលាក់បាំងអី​នៅ​ពីក្រោយ​នោះទេដឹង?

យ៉ាងណាក៏ដោយម្ដាយជនរងគ្រោះ សូមគោរពស្នើសុំដល់លោកប្រធានតុលាការសាលាដំបូងខេត្តកំពង់ស្ពឺ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងប្រមុខថ្នាក់ដឹកនាំគ្រប់លំដាប់ជាន់ថ្នាក់ សូមជួយរកយុត្តិធម៌ដល់រូបអ្នកស្រីផង ព្រោះអ្នកស្រីទើបតែមកពីធ្វើការនៅប្រទេសថៃពុំមានប្រាក់ព្យាបាលជំងឺកូនរបស់អ្នកស្រីនោះទេ ហើយម្យ៉ាងទៀតសូមវែកមុខជនបង្កដែលបានបើកបរខុសច្បាប់ ដែល​បាន​បើករថយន្តទៅបុកកូនអ្នកស្រី ហើយរត់គេចខ្លួនមិនទទួលខុសត្រូវ មកផ្ដន្ទាទោសទៅតាមច្បាប់ ដើម្បីផ្ដល់ភាពយុត្តិធម៌ដល់លោកស្រីក៏ដូចជាពលរដ្ឋស្លូតត្រង់ផង។

អង្គភាពយើងផ្សាយតែរឿងពិតមិនមានចេតនាមួលបង្កាច់ស្ថាប័នណាមួយឡើយ ផ្សាយទៅតាមក្រមសីលធម៌និងវិជ្ជាជីវៈនៃរបបសារព័ត៌មាន ហើយរង់ចាំការបកស្រាយពន្យល់ពីគ្រប់ភាគីដែលពាក់ព័ន្ធ រៀងរាល់ម៉ោងធ្វើការ៕