សៀមរាប៖ ក្រុមគ្រួសាររបស់លោក ម៉ោញ អំ ត្រូវបានលោក អ៊ូ កុកម៉េង និងជំទាវ លី អ៊ុំអេង

ដែលធ្លាប់មានរឿងអាស្រូវជាច្រើននៅក្នុងខេត្តសៀមរាប និងក្រៅខេត្តផងនោះ

និងលោក សាទ រ៉ម រំលោភទំនុកចិត្តយកប្លង់កម្មសិទ្ធិរបស់លោក ម៉ោញ អំ យកទៅលក់ឱ្យឈ្មួញចំនួន១៣ហិកតា ស្ថិតនៅភូមិរំចេក ឃុំរំចេក ស្រុកបន្ទាយស្រី ខេត្តសៀមរាប ទាំងអយុត្តិធម៌ ហើយរូបលោកផ្ទាល់ក៏បានត្រូវជាប់ពន្ធនាគារកាលពីថ្ងៃទី២៩ ខែមករា ឆ្នាំ២០២១ ដោយសារតែដីរបស់ខ្លួនឯងផងដែរ រហូតមកដល់បច្ចុប្បន្ននេះក្រុមគ្រួសាររបស់លោកនៅមិនទាន់ទទួលបានយុត្តិធម៌នៅឡើយ ដោយពួកគាត់ត្រូវរស់នៅក្នុងការភិតភ័យ និងរត់ពួនខ្លាចគេចាប់ដាក់ពន្ធនាគារម្តងទៀត។

យោងតាមការរៀបរាប់របស់លោក ម៉ោញ អុំ បានប្រាប់មកកាន់អង្គភាពសារព័ត៌មានយើងខ្ញុំថា មានលោក សាទ រ៉ម បានទៅលួងលោមបោកបញ្ឆោតថាយកប្លង់ដីកម្មសិទ្ធិរបស់គាត់យកទៅឱ្យគេមើល ដោយហេតុតែទុកចិត្តគេ និងខ្លួនមិនចេះអក្សរអីផងនោះក៏បានឱ្យលោក សាទ រ៉ម យកប្លង់កម្មសិទ្ធិច្បាប់ដើមទៅឱ្យគេមើលទៅ ក្រោយមកលោកចេះតែទៅសួរយកប្លង់ដីមកវិញ តែត្រូវលោក សាទ រ៉ម បដិសេធថាមិនដឹងប្លង់អីទេ ទើបលោកដឹងថាត្រូវគេប្លន់យកទាំងប្លង់ទាំងដីរបស់គាត់ដែលមានចំនួន១៣ហិកតា ដើម្បីយកទៅលក់ឱ្យលោក អ៊ូ កុកម៉េង និងជំទាវ លី អ៊ុអេង ដែលជាក្រុមហ៊ុនពុះដីឡូតិ៍ខ្យល់លក់បាត់ទៅហើយ។

លោក ម៉ោញ អំ បានបញ្ជាក់ប្រាប់អ្នកសារព័ត៌មានបន្ថែមថា លោកពិតជាមិនបានលក់ដីរបស់លោកទាំង១៣ហិកតា ឱ្យទៅនរណាម្នាក់ទេប្រសិនបើលោកបានលក់នោះលោកបានលុយចាយហើយ តែសូម្បីតែមួយរយរៀលលោកមិនបានផង លោកបានបន្តថា លោកមិនដែលបានផ្តិតមេដៃលក់ដីឱ្យគេទេ តែបើលោកផ្តិតមេដៃឱ្យនោះគឺលោកផ្តិតឱ្យតែមេធាវីដែលការពារក្តីឱ្យលោក រហូតដល់លោកត្រូវបានជាប់ពន្ធនាគារដោយសារតែដីកេរ្តិ៍ពីដូនតារបស់គាត់ចំនួន១៣ហិកតាខាងលើនេះទៀត។

លោក ម៉ោញ អំ និងប្រពន្ធ ឈ្មោះ សុខ ចិន រួមទាំងក្រុមគ្រួសារកូនៗរបស់លោកសុំសំណូមពរដល់សម្តេចតេជោ ហ៊ុន សែន និងលោកជំទាវ ប៊ុន រ៉ានី ហ៊ុន សែន រួមទាំងសម្តេចបវរធិបតី ហ៊ុន ម៉ាណែត និងលោកជំទាវ ពេជ្រ ចន្ទមុនី និងក្រសួងសាមីពាក់ព័ន្ធគ្រប់ជាន់ថ្នាក់មេត្តាជួយរកយុត្តិធម៌ជូនដល់ក្រុមគ្រួសាររបស់លោកផង ដោយសារតែគ្រួសាររបស់លោកទីទាល់ក្រ និងមានសមាជិកគ្រួសារជាច្រើននាក់ បច្ចុប្បន្ននេះពួកគាត់មិនទាន់មានកន្លែងស្នាក់អាស្រ័យពិតប្រាកដនៅឡើយទេ ដោយសារតែមានភិតភ័យពីសំណាក់បក្សពួករបស់លោក អ៊ូ កុកម៉េង និងជំទាវ លី អ៊ុអេង នេះតែម្តង។

ក្នុងករណីខាងលើនេះដែរអង្គភាពយើង នៅតែមិនអាចសុំការបំភ្លឺពី លោក អ៊ូ កុកម៉េង និង ជំទាវ លី អ៊ុអេង បានទេព្រោះគ្មានលេខទំនាក់ទំនង ហើយអង្គភាពយើងក៏បានសុំការបំភ្លឺពីលោកមេភូមិរំចេក លោក ឡុង តក់ បានឆ្លើយប្រាប់មកអ្នកសារព័ត៌មានយើងថា គាត់បានទទួលស្គាល់ថា គាត់បានចុះហត្ថលេខាមែន ក៏ប៉ុន្តែ ពុំមែនលោក ម៉ោញ អំ ម្ចាស់ដីយកមកចុះនោះទេ គឺលោកភូមិបាលស្រុកបន្ទាយស្រីចាស់ លោក ឡេង សុផល អ្នកកាន់យកមកចុះហត្ថលេខាលក់ដូរជាមួយគាត់តាំងពីឆ្នាំ២០០៤ មកម្ល៉េះ  នេះបើតាមការបញ្ជាក់ពីមេភូមិរំចេកបញ្ជាក់ប្រាប់អង្គភាពយើង។

ចំណែកឯលោក ឡេង សុផល លេខទូរសព្ទ ០៧៦ ៧៧២ ២២២៧ អ្នកសារព័ត៌មានយើងក៏មិនអាចសុំការបំភ្លឺបានទេព្រោះទាក់ទងមិនចូល។

បច្ចុប្បន្ននេះ លោក ម៉ោញ អំ និងក្រុមគ្រួសារ ពុំទាន់មានការដោះស្រាយនៅឡើយទេ លោក និងប្រពន្ធ រួមទាំងកូនៗបានអះអាងថា ដីស្រែចំការរបស់គាត់គឺមានចំនួន១៣ហិកតា ទាំងមានប្លង់និងមិនទាន់មានប្លង់ ដែលស្ថិតនៅក្នុងភូមិឃុំខាងលើ គឺត្រូវបានឈ្មោះ សាទ រ៉ម បានបញ្ឆោតគាត់យកប្លង់ដីរបស់គាត់ និងបានត្រូវរ៉ូវគ្នាជាមួយសមត្ថកិច្ចមូលដ្ឋានយកទៅលក់ឱ្យទៅឈ្មួញអស់ទៅហើយ ក្រុមគ្រួសាររបស់គាត់រកព្រឹកខ្វះល្ងាច ជួនកាលដាច់បាយក៏មានដែរ និងត្រូវរស់នៅបន្លាស់ទីគ្រប់ទីកន្លែងព្រោះខ្លាចគ្រួសារអ្នកមានអំណាចមានលុយចាប់ដាក់ពន្ធនាគារទៀត។

ហើយគាត់បានបញ្ជាក់ប្រាប់អ្នកកាសែតយើងថា កាលកន្លងមកគាត់បានប្តឹងចូលទៅសាលាដំបូង និងសាលាឧទ្ធរណ៍ដែរ តែពុំមានចំណាត់ការដោះស្រាយជូនពួកគាត់បាននៅឡើយ។

គាត់បានបន្តទៀតថាគាត់មានសាក្សីរស់ជាច្រើននាក់ ថែមទាំងអ្នកភូមិរំចេកជាច្រើនអ្នកនិងមេឃុំចាស់ទៀតផង បានចូលទៅបំភ្លឺនៅក្នុងតុលាការនិងបំភ្លឺជូនសមត្ថកិច្ចពាក់ព័ន្ធក្នុងមូលដ្ឋានផងដែរ។

អង្គភាពសារព័ត៌មានខ្មែរឦសានយើងខ្ញុំផ្សាយតែរឿងពិតគ្មានចេតនាញុះញង់ឬធ្វើឱ្យប៉ះពាល់ដល់ស្ថាប័នណាមួយឡើយ ផ្សាយទៅដោយក្រមសីលធម៌ និងវិជ្ជាជីវៈរបបនៃសារព័ត៌មាន ហើយនឹងរង់ចាំការបកស្រាយបំភ្លឺបន្ថែមពីគ្រប់ភាគីពាក់ព័ន្ធគ្រប់ពេលនិងម៉ោងធ្វើការ៕