ព្រោះតែជីវភាពខ្វះខាតបានធ្វើឱ្យគ្រួសារមួយត្រូវបាត់បង់កូនទាំងពីរដោយសារលង់ទឹកស្លាប់ខណៈដែលម្តាយកំពង់តែស៊ីឈ្នួលជម្រះស្មៅឱ្យគេនៅក្បែរបឹង
មណ្ឌលគិរី៖ នៅវេលាម៉ោង៤ល្ងាច ថ្ងៃទី២៧ ខែមេសា ឆ្នាំ២០២៥ ក្មេងប្រុសម្នាក់ និងស្រីម្នាក់បានលង់ទឹកស្លាប់ទាំងពីរនាក់បងប្អូននៅភូមិប៊ូស្រា ឃុំប៊ូស្រា ស្រុកពេជ្រាដា ខេត្តមណ្ឌលគិរី បច្ចុប្បន្នគ្រួសារកំពង់តែធ្វើបុណ្យសពតាមប្រពៃណី។
ដោយសារតែជីវភាពខ្វះខាតម្តាយក្មេងរងគ្រោះបានទៅស៊ីឈ្នួលជម្រះស្មៅឱ្យគេនៅក្បែរបឹងក្នុងភូមិឃុំខាងលើ ដោយរវល់ជម្រះស្មៅភ្លេចខ្លួនបន្តិចកូនរបស់គាត់ទាំងពីរនាក់បាននាំគ្នាចុះទៅងូតទឹកបឹងលេង ហើយបានលង់ទឹកស្លាប់ទាំងពីរនាក់បងប្អូនតែម្តង។
ក្មេងស្រីរងគ្រោះឈ្មោះ ចាន់ សារ៉ាយ អាយុ៩ឆ្នាំ និងក្មេងប្រុស ឈ្មោះ ចាន់ សារឿន អាយុ៦ឆ្នាំ បានស្លាប់បាត់បង់ជីវិតដោយសារលង់ទឹក ដែលមានឪពុកឈ្មោះ ចាន់ សារូ ម្ដាយឈ្មោះ ភ្លើត ទីម មុខរបរជាកសិករ បច្ចុប្បន្នរស់នៅភូមិប៊ូស្រា ឃុំប៊ូស្រា ស្រុកពេជ្រាដា ខេត្តមណ្ឌលគិរី មានកូនប្រុសស្រីចំនួនពីរនាក់កូនស្រីច្បងឈ្មោះ សារ៉ា និងកូនប្រុសពៅឈ្មោះ សារឿន បានលង់ទឹកស្លាប់ទាំងពីរនាក់បងប្អូន។
យោងតាមប្រភពពីអ្នកជិតខាងដែលចូលរួមក្នុងពិធីបុណ្យសពរបស់ក្មេងរងគ្រោះទាំងពីរនាក់បានប្រាប់មកអង្គភាពសារព័ត៌មានយើងខ្ញុំថា គ្រួសាររបស់គាត់មានជីវភាពខ្វះខាតខ្លាំងក្រៅធ្វើចម្ការហើយពួកគាត់ឆ្លៀតស៊ីឈ្នួលគេគ្រប់យ៉ាងដើម្បីយកកម្រៃមកចិញ្ចឹមជីវិត និងកូនប្រុសស្រីរបស់ពួកគាត់ តែអកុសលអីព្រោះតែធ្វើការឱ្យគេភ្លេចខ្លួនមួយភ្លែតសោះបានធ្វើឱ្យពួកគាត់បាត់បង់កូនប្រុសស្រីតែមួយប៉ព្រិចភ្នែកពិតជាអាណិតពួកគាត់ណាស់ ហើយគាត់ក៏សូមសំណូមពរដល់សប្បុរសជន ដែលមានចិត្តល្អ ចិត្តធម៌មេត្តាជួយបរិច្ចាគទឹកប្រាក់ខ្លះដើម្បីជួយឱ្យគាត់បានធ្វើបុណ្យសពជូនកូនៗរបស់គាត់ឱ្យបានសមរម្យតាមប្រពៃណីផងចុះ សូមអរគុណ៕
