រតនគិរី៖ កាលពីព្រឹកថ្ងៃទី០៨ ខែឧសភា ឆ្នាំ២០២៥ថ្មីៗនេះ មន្ត្រីយោធាម្នាក់នៅស្រុកកូនមុំ ត្រង់ចំណុចភ្នំយ៉ាកណាង ស្រែទាហ៊ានស្ថិតនៅក្នុងភូមិ២ ឃុំត្រពាំងច្រេស ស្រុកកូនមុំ ខេត្តរតនគិរី បានយកអាវុធAK47ស្វាយបត់មួយដើមទៅបាញ់ចំនួន៧គ្រាប់គំរាមប្រជាពលរដ្ឋយកដីខណ:​ដែល​ពួកគាត់៣នាក់កំពុងតែភ្ជួរដាស់ដីស្រែដើម្បីបង្កបង្កើនផលនារដូវវស្សាខាងមុខនេះ។

ប្រភពពី​ពលរដ្ឋ​បាន​ប្រាប់​មកកាន់អង្គភាព​សារព័ត៌មានយើង​ខ្ញុំថា មន្ត្រីយោធាម្នាក់នោះមានឈ្មោះ ស៊ិន ទូច  មានឋានន្តរសក្តិ ជាវរៈសេនីយ៍ទោ សក្តិ4កន្លះ ទទួលបន្ទុកនាយការិយា​ល័យ​អភិវឌ្ឈន៍ នៃតំបន់ប្រតិបត្តិការសិកខេត្តរតនគិរី ហើយ​ជនរងគ្រោះដែល​រង​ការ​បាញ់គំរាមមានចំនួនបីនាក់ រួមមានទី១.ឈ្មោះ សុខ តុង ភេទប្រុស អាយុ២៣ឆ្នាំ មានមុខរបរកសិករ គឺជាសិស្សរៀនថ្នាក់ទី១១ ទី២.ឈ្មោះ សុខ ទីន ភេទប្រុស អាយុ២០ឆ្នាំជាប្អូន និងទី៣.ឈ្មោះ គឿន ផានិត ភេទប្រុស អាយុ១៧ឆ្នាំ ត្រូវជាក្មួយ  ជនរងគ្រោះទាំងបីនាក់ខាងលើមានទីលំនៅភូមិ២ ឃុំត្រពាំងច្រេស ស្រុកកូនមុំ ខេត្តរតនគិរី។

ជនរងគ្រោះបានប្រាប់ឱ្យដឹងថា នៅមុនកើតហេតុពួកគាត់កំពុងតែភ្ជួរដីស្រែនៅទីតាំងខាងលើ ពេលនោះស្រាប់តែឃើញបុរសម្នាក់ពាក់ឯកសណ្ឋានជាយោធាដែលគេស្គាល់ឈ្មោះថា ស៊ិន ទូច ជាមន្រ្ដីយោធានោះ បានចុះពីលើរថយន្តប្រដាប់ដោយអាវុធAK47ស្វាយបត់ មួយដើម និង​កាំភ្លើងខ្លីមួយដើមសៀតនៅចង្កេះ រួចដើរសំដៅទៅវាលស្រែដែលពួកគាត់កំពង់តែភ្ជួរដីដោយគោយន្តកន្ត្រៃយ៍ ភ្លាមនោះមន្ត្រីយោធាបានសួរនាំពីរបីមាត់ថា «អាណាអោយពួកឯងមកភ្ជួរដីនេះ?» ពួកគាត់​ឆ្លើយតបសឹងមិនទាន់ផង មន្ត្រីយោធានោះ ក៍លើកកាំភ្លើង​អាការួចបាញ់ទៅលើមេឃចំនួនពីរគ្រាប់ និងបាញ់ផ្ទុបដីចំនួនពីរបីគ្រាប់ថែមទៀត គឺចំប្រឡោះជើង​របស់​ពួកគាត់ដែលកំពុងភ្ជួរដីនោះ។

ជនរង​គ្រោះ​បាន​បញ្ជាក់​បន្ថែមថា ក្រោយបាញ់បោះដោយសេរីរួចមន្ត្រីយោធានោះក៍ដើរសំដៅទៅរថយន្តបម្រុងឡើងជិះទៅហើយ ក៏ឃើញយុវជនម្នាក់លើកទូរស័ព្ទថតរូបគាត់ ធ្វើឱ្យ​មន្ត្រីយោធារូបនោះខឹងបានលើកកាំភ្លើងបាញ់ទៅលើមេឃម្តងទៀតរួចបើកឡានត្រឡប់ទៅវិញបាត់ទៅ បន្ទាប់​ពី​កើត​ហេតុជនរងគ្រោះក៍នាំគ្នាទៅប៉ុស្ថិរដ្ឋបាលនគរបាលឃុំត្រពាំងច្រេស ដើម្បីដាក់ពាក្យបណ្តឹង ប៉ុន្តែមន្ត្រីប៉ុស្ថិ៍មិនទទួលរួចប្រាប់ឱ្យទៅអធិការតាហ្មងទៅ ជនរងគ្រោះក៍នាំគ្នាបន្ដទៅអធិការដ្ឋាននគរបាលស្រុកកូនមុំដើម្បីដាក់ពាក្យប្ដឹងមន្ត្រីយោធានោះតែលទ្ធផលនៅពុំទាន់បានដឹងនៅឡើយទេ។

យោង​តាម​ប្រភពពីស្រ្ដីមេម៉ាយម្នាក់ឈ្មោះ ភី វៀន អាយុ៤៨ឆ្នាំ ត្រូវជាម្តាយជនរងគ្រោះ បានប្រាប់ឱ្យ​សារព័ត៌មានដឹងថា ដីស្រែនៅទីតាំងខាងលើនោះគាត់បានចូលទៅកាន់កាប់និងអាស្រ័យផលតាំងពីឆ្នាំ១៩៩៣មក គឺមានដីស្រែទំហំប្រមាណ៤ហិកតា ដីចំការចន្ទីទំហំប្រមាណ ៣ហិកតា និងដីដាំដំឡូងមីទំហំប្រមាណ២ហិកតា ចាប់ពីពេលនោះគាត់បានអាស្រ័យផលរហូតមកដល់និងពេលនេះពោលគឺជាង៣០ឆ្នាំមកហើយ។

លោកស្រីបន្តថា ក្រៅពីក្រុមគ្រួសារលោកស្រីនៅមានបងប្អូនប្រជាពលរដ្ឋប្រមាណជាងដប់គ្រួសារទៀតដែលបានកាន់កាប់ដី និងអាស្រ័យផលនៅទីនោះ ដោយគ្រួសារខ្លះមានចំនួន២ទៅបីហិកតា ទៅតាមសមាជិកគ្រួសារនិមួយៗដោយបង្កបង្កើនផលចិញ្ចឹមជីវិតរហូតមកពុំដែលមានបុគ្គលណាម្នាក់មករារាំងនោះឡើយ លុះមកដល់ក្នុងអំឡុងឆ្នាំ២០២៤ ដីឡើងថ្លៃ ក៏ ស្រាប់តែលេចមុខមន្ត្រីយោធាមួយក្រុមដឹកនាំដោយលោក ស៊ិន ទូច បានមកអះអាងក្តែងៗថា ដីទាំងអស់នេះជាដីទាហានទៅវិញ ពុំដឹងសម្អាងលើអ្វីនោះទេ ពួកគាត់បានរងកាគំរាមពីសំណាក់យោធាស្រុកកូនមុំជាច្រើនដង តែប្រជាពលរដ្ឋមិនព្រមចាកចេញឡើយ ក៏បាន​ធ្វើឱ្យលោក ស៊ិន ទូច បានយកកាំភ្លើងបាញ់រះជាច្រើនគ្រាប់ ធ្វើឱ្យកូនៗរបស់ពួកគាត់ភ័យស្ទើស្លាប់នៅលើដីនឹង​ទៅហើយ។

សូមស្តាប់ការរៀបរាប់​របស់​លោកស្រី ភី វៀន

ពាក់ព័ន្ឋករណីផ្ទុះអាវុធសេរីជាច្រើនគ្រាប់ពីសំណាក់មន្ត្រីយោធា រូបនោះ អង្គភាពយើងបានខលទៅ លោក ស៊ិន ទូច ដើម្បីសុំកាពន្យល់ដែរ តែលោក​មិន​បាន​និយាយ​ពីបញ្ហានេះ​ទេ តែលោក​បែ​ជានិយាយបង្វៀងទៅណាឯនោះទៅវិញ រួចក៏បិតទូរស័ព្ទទៅ។

ចំណែក លោក ម៉ុយ សុផាត មេបញ្ជាការតំបន់សឹករងខេត្តរតនគិរី WCV យើងបានព្យាយាមខលទៅដែរប៉ុន្តែលោកថាជាប់រវល់ ។

ផ្ដើមចេញពីការបាញ់គំរាមយកដីប្រជាពលរដ្ឋស្លូតត្រង់នៅស្រុកកូនមុំនោះដែរលោកស្រី ភី វៀន ជាអាណាព្យាបាលយុវជនរងគ្រោះទាំងបីនាក់នោះបានលើកដៃទទូចស្នើសុំ🙏សំណូមពរ​ដល់សម្តេចពុកតេជោរ ហ៊ុន សែន ប្រធានព្រិទ្ឋសភា និងសម្តេច មហាបវរធិបតីហ៊ុនម៉ាណែត នាយករដ្ឋមន្ត្រីនៃកម្ពុជា មេត្តាជួយអន្ដរាគមន៍ក្នុងរឿងនេះផង ព្រោះមន្ត្រីយោធាម្នាក់នេះគេកំពុងប្រើអំណាចដើម្បីរំលោភយកដីស្រែចម្ការប្រជាពលរដ្ឋដែលកំពុងអាស្រាយផលនៅស្រុកកូនមុំនោះហើយ នាងខ្ញុំជាស្ត្រីមេម៉ាយទន់ខ្សោយមិនអាចតតាំងបានទេនិងកំពុងរស់ក្នុងភាពភ័យខ្លាចគ្រប់ពេល ខ្ញុំមិនចង់បាត់បង់ដីនោះទេ សព្វថ្ងៃខ្ញុំរស់បានដោយសារបង្កបង្កើតផលចិញ្ចឹមជីវិតនៅលើដីនោះ មានតែសម្ដេចទាំងពីរទេទើបជាទីពឹងដ៍កក់ក្ដៅតែមួយគត់របស់ប្រជាពលរដ្ឋ។

អង្គភាពសារព័ត៌មានខ្មែរឦសានយើងខ្ញុំផ្សាយតែរឿងពិត មិនមានបំណងញ៉ុះញ៉ង់ ឬបង្ករឱ្យមានផលប៉ះពាល់ដល់ស្ថាប័នណាមួយឡើយ ហើយនឹងរង់ចាំការបកស្រាយបំភ្លឺបន្ថែមពីគ្រប់ភាគីដែលពាក់ព័ន្ធគ្រប់ពេលនិងម៉ោងធ្វើការ៕