រតនគិរី៖ ផ្លូវ​លំ​មួយខ្សែរក្រាល​គ្រួស​ក្រហមមានប្រវែងសរុប19km ចាប់​ផ្តើម​ស្ថាបនាឡើងវិញ​ ឆ្ពោះទៅដល់ព្រំប្រទល់ខេត្តរតនៈគិរី និងខេត្តស្ទឹងត្រែង  ជូនដល់​​ប្រជា​ពលរដ្ឋ​ជាង​មួយ​ពាន់​ គ្រួសារ នឹងជួសជុលឱ្យរួចរាល់ក្នុងឆ្នាំ2025ខាងមុខនេះ។

ផ្លូវក្រាលក្រួសក្រហម លេខ3781B មានប្រវែង 19km ទទឹង 8 m ដែលតភ្ជាប់ពីផ្លូវ​ជាតិ​ DBST លេខ78  ឆ្ពោះទៅដល់ព្រំប្រទល់ខេត្តរតនៈគិរី និងខេត្តស្ទឹងត្រែងជាប់ស្នាក់ការកងរាជអាវុធហត្ថក្របីជ្រុំលេខ781 ព្រំប្រទល់ភូមិក្របីជ្រុំ ស្រុកសេសាន្ត ខេត្តស្ទឹងត្រែង និងខេត្តរតនគិរី ដែលកំពង់​សាងសង់ជិតរួចរាល់ហើយ។

យោង​តាម​ប្រភព​ពីលោក សាយ សាមាន ប្រធានមន្ទីរសាធារណការ និងដឹកជញ្ជូនខេត្តរតនគិរី នៅព្រឹកថ្ងៃទី២៨ ខែធ្នូ ២០២៤ បានប្រាប់​មក​កាន់​អង្គភាពសារព័ត៌​មាន​យើង​ខ្ញុំថា ផ្លូវក្រួសក្រហម១ខ្សែនេះ មានប្រវែងសរុប 19km  ដែលសម្គាល់ លេខ3781B   បើកមុខ20m គិត​ចាប់​ពី​ចិញ្ចើមប្រឡាយទាំងសង្ខាង និងសាច់ទ្រូងផ្លូវទទឹង 8m  ជួសជុលឡើងវិញដោយមន្ទីរសាធារណការ​ ខេត្តរតនគិរី ជាគម្រោង​របស់​ថវិកាជាតិ ដោយពុំអាចបញ្ជាក់តម្លៃបាននោះទេ។

លោកប្រធានមន្ទីរបន្តថា  ផ្លូវមួយខ្សែនេះនៅសល់ 8.350Km ប៉ុណ្ណោះ នឹងជួសជុលដល់ព្រំប្រទល់ខេត្តស្ទឹងត្រែង ហើយនឹងត្រូវជួសជុលឱ្យ​រួចរាល់ក្នុងឆ្នាំ2025ខាងមុខនេះ។

លោក លឹម វិចិត្រ មន្ត្រីបច្ចេកទេសប្រចាំនៅការដ្ឋានជួសជុលផ្លូវផ្ទាល់ បានបញ្ជាក់មក​កាន់​អង្គភាព​សារព័ត៌មាន​យើងខ្ញុំនៅថ្ងៃទី២៨ ដដែលនោះថា ផ្លូវក្រួសក្រហម១ខ្សែនេះ ត្រូវឆ្លងកាត់លូចំនួន 24កន្លែង  បើបូកនិងលូកោងថ្មី របស់លោក ស៊ុន ប៉ូលីន អតីតប្រធានមន្ទីរសាធារណការមុនចំនួន១ លូដែលសាងសង់ខុសស្តង់ដារគឺមានចំនួន25លូ ឯណោះ។

មេឃុំត្រពាំងក្រហមលោក មាឃ ម៉ី នៅល្ងាចថ្ងៃទី២៨ធ្នូ ដដែលបានបញ្ជាក់ តួលេខស្ថិតិចំនួនប្រជាជនរស់នៅភូមិ3 បច្ចុប្បន្នប្រើប្រាស់ផ្លូវក្រាលក្រួសក្រហម១ខ្សែ ជាប្រចាំដោយដឹកកសិផលផ្សេងៗមកកាន់ទីផ្សារ ជាពិសេសសិស្សសាលាត្រូវធ្វើដំណើរមកសិក្សារៀនសូត្រ នៅវិទ្យាល័យត្រពាំងក្រហមជាដើម។

លោកមេឃុំបញ្ជាក់ថា គ្រួសារសរុបស្មើ1006គ្រួសារ ក្នុងនោះគ្រួសារអចិន្ត្រៃយ៍ 974 គ្រួសារបណ្តោះអាសន្នចំនួន32គ្រួសារ ដែលមានចំនួនមនុស្សសរុប3854នាក់ ក្នុងនោះស្រី1881នាក់ ក្នុងនាមលោកជាអាជ្ញាធរ ជាឪពុកម្តាយ ប្រជាពលរដ្ឋសូមសម្តែងការអរគុណ នឹងដឹងគុណ ដល់ប្រមុខរាជរដ្ឋាភិបាលដែលបានចំណាយកញ្ចប់ថវិការបស់ជាតិដើម្បីជួសជុលផ្លូវគ្រួស​ក្រហម​មួយខ្សែរនេះឱ្យ​ល្អប្រសើរឡើងវិញ ដើម្បីប្រជាពលរដ្ឋធ្វើដំណើរងាយស្រួលបានលឿននិងរហ័ស លោកក៍បានអំពាវនាវដល់ពុកម៉ែបងប្អូនរស់នៅក្នុងភូមិ3 ទាំងអស់គ្នាសូមចូលរួមកែលំអ និងថែរក្សាផ្លូវនេះឱ្យបានគង់វង្សនិងយូអង្វែងទាំង​អស់គ្នា៕

រាយការណ៍ដោយគេហទំព័រ ខ្មែរឦសាន ផ្សាយចេញពីខេត្តរតនគិរី